NepalBani FM

पहिरोको जोखिम घटाउँदै मेची राजमार्ग डबल लेनमा, करोडौँका आयोजना अघि बढ्दै

गणेश घिमिरे
साउन ८, इलाम
पूर्वी पहाडी जिल्लाहरू इलाम, पाँचथर र ताप्लेजुङलाई जोड्ने मेची राजमार्गलाई आधुनिक र सुरक्षित सडकका रूपमा विकास गर्ने अभियानले गति लिन थालेको छ । राजमार्ग अन्तर्गत विभिन्न सडक खण्डमा डबल लेन विस्तार, नयाँ पक्की पुल निर्माण, घुम्ती सुधार तथा पहिरो नियन्त्रणका काम एकैसाथ अघि बढेका छन् । सडक डिभिजन कार्यालय इलामका अनुसार यी आयोजना सम्पन्न भएपछि वर्षौंदेखि यात्रुले भोग्दै आएको साँघुरो सडक, जोखिमपूर्ण घुम्ती र पहिरोको समस्या उल्लेख्य रूपमा कम हुने अपेक्षा गरिएको छ । कार्यालयका प्रमुख पवन भट्टराईका अनुसार मेची राजमार्गलाई दीर्घकालीन रूपमा सुरक्षित, भरपर्दो र सहज बनाउन सडक चौडा पार्ने मात्र होइन, आधुनिक इन्जिनियरिङ प्रविधिमार्फत पहिरो नियन्त्रणलाई पनि प्राथमिकतामा राखिएको छ । इलामको धोबिधारा–मिलगोलाई सडक खण्डमा १५ किलोमिटर सडक स्तरोन्नतिको काम दुई वटा प्याकेजमा सुरु भइसकेको छ । करिब ७४ करोड रुपैयाँ लागतको यस आयोजनाअन्तर्गत सडकलाई डबल लेनमा विस्तार गरिनेछ । यसै योजनामा सानबीरे खोल्सीमा २५ मिटर लामो आरसीसी पुल निर्माण हुनेछ भने बञ्चरे गोलाई र मिलगोलाई क्षेत्रमा बारम्बार खस्ने पहिरो नियन्त्रणका लागि रिटेनिङ वाल र सोयल नेलिङ प्रविधि प्रयोग गरिनेछ । आयोजनाको निर्माण अवधि ३० महिना तोकिएको छ । त्यसैगरी इलामकै बाघखोर–राँके ९ किलोमिटर सडक खण्डको स्तरोन्नतिका लागि १० करोड ५० लाख रुपैयाँमा ठेक्का लागिसकेको छ । हाल विस्तृत सर्वेको काम भइरहेको यस योजनामा सडक चौडा बनाउने लगायतका पूर्वाधार निर्माण गरिनेछ । यसको निर्माण अवधि पनि ३० महिना रहेको छ । जोरकलश–हर्कटे १५ किलोमिटर सडक खण्डमा २५ करोड रुपैयाँ लागतमा काम भइरहेको छ ।

२४ महिनाको अवधि रहेको यस योजनाको करिब एक वर्षको काम सम्पन्न भइसकेको छ । यही आयोजनाबाट करिब ३ करोड रुपैयाँ खर्च गरी हालै ठूलो क्षति पुगेको माइखोला–राजदुवाली क्षेत्रमा पहिरो नियन्त्रणको कामसमेत अघि बडिरहेको छ । मेची राजमार्गअन्तर्गत पाँचथरको जोरपोखरी–गोपेटार ५ किलोमिटर सडक खण्डमा साढे पाँच करोड रुपैयाँ लागतमा स्तरोन्नतिको काम सुरु भइसकेको छ । यस आयोजनाको निर्माण अवधि एक वर्ष निर्धारण गरिएको छ । ताप्लेजुङतर्फ काबेली–ताप्लेजुङ २२ किलोमिटर सडक खण्डमा १० करोड रुपैयाँ लागतमा सुधार कार्य अघि बढाइएको छ । यस योजना अन्तर्गत सडकका जोखिमयुक्त घुम्तीहरू कटिङ गरी यात्रा सुरक्षित र सहज बनाइनेछ । यसैबीच इलामको दानाबारी–बेलासे सडक खण्डको बेलासे–माइखोलामा १ सय १० मिटर लामो पक्की पुल निर्माणको प्रक्रिया अघि बढेको छ । करिब २३ करोड रुपैयाँ लागत अनुमान गरिएको यो पुल निर्माण भएपछि वर्षायाममा हुने आवागमन अवरोध अन्त्य हुने विश्वास गरिएको छ । यता सन्दकपुर गाउँपालिका अन्तर्गत टोड्के झरना–फेमेगुरु सडक खण्डमा ग्राभेलका लागि २५ करोड रुपैयाँको ठेक्का लागिसकेको सडक डिभिजन कार्यालय इलामले जनाएको छ । मेची राजमार्गका पहिरो प्रभावित क्षेत्रमा प्रयोग हुन लागेको सोयल नेलिङ आधुनिक भू–इन्जिनियरिङ प्रविधि हो । यस प्रविधिमा पहिरो जाने सम्भावना भएको ढिस्को वा भित्तामा स्टिलका लामो रड (नेल) गाडेर त्यसलाई कङ्क्रिट र जालीमार्फत मजबुत बनाइन्छ । यसले माटोलाई चिप्लिन नदिई स्थिर राख्ने भएकाले सडकमाथिबाट ढुंगा र माटो खस्ने जोखिम उल्लेख्य रूपमा घट्छ । विशेषगरी पहाडी सडकमा यो प्रविधि प्रभावकारी र दीर्घकालीन समाधानका रूपमा प्रयोग हुँदै आएको छ ।

मेची राजमार्ग डबल लेनमा विस्तार भएपछि इलाम, पाँचथर र ताप्लेजुङका नागरिकले सुरक्षित, सहज र छिटो यात्रा गर्न पाउनेछन् । साँघुरो सडकका कारण हुने सवारी जाम र दुर्घटनाको जोखिम कम हुनेछ भने ठूला सवारीसाधन सहज रूपमा सञ्चालन गर्न सकिनेछ । यी सबै आयोजना निर्धारित समयमै सम्पन्न गर्न निर्माण कम्पनीसँग नियमित समन्वय भइरहेको कार्यालय प्रमुख भटटराईको भनाई छ । योजनाहरू पूरा भएपछि मेची राजमार्ग पूर्वी पहाडको सुरक्षित, दिगो र आर्थिक गतिविधिलाई गति दिने आधुनिक सडक सञ्जालका रूपमा स्थापित हुने विश्वास व्यक्त गरिएको छ ।